Korean giingong nalumos samtang naligo
CEBU, Philippines – Usa ka 26-anyos nga Korean national ang nalumos atol sa pagkaligo niini diha sa swimming pool sa usa ka resort sa Barangay Zaragosa, Lungsod sa Badian, niadtong Martes sa hapon.
Ang nalumos mao si Yeonho Suk, ulitawo, nagbakasyon sa maong lugar.
Matud ni Police Staff Sergeant Carlito Coronel, desk officer sa Badian Police Station nga nianang pagkagabii sa maong adlaw niabot sa ilang buhatan ang kauban ni Yeonho nga si Choi Jongkun ug ni-report kini kabahin sa maong hitabo.
Base sa imbestigasyon sa kapolisan nangaligo sa swimming pool ang maong mga langyaw.
Si Yeonho niambak diha sa lawom nga bahin sa swimming pool diin pipila ka gutlo nitungha kini ug nianha sa mabaw nga bahin nga nagpanghikap sa iyang dughan hinungdan nga dali kining gidala diha sa Badian District Hospital.
Matud ni Coronel nga natabang pa si Yeonho sa maong tambalanan apan giingong mga alas 7:00 sa gabii nakabsan kini sa kinabuhi.
Ang kapolisan sa lungsod mopahigayon og follow-up nga imbestigasyon sa maong insidente. (/BDB)(BANAT NEWS)
- Latest
