‘Resign Faeldon’ panawagan sa mga Chiong

CEBU, Philippines – Nanawagan ang magtiayon Dionesio ug Thelma Chiong sa pagpa-resign sa labaw sa Bureau of Corrections nga si Nicanor Faeldon.

Kini human gipagawas ang tulo sa pito ka akusado sa pagdagit ug pagpatay sa ilang duha ka anak nga sila si Maryjoy ug Jacqueline Chiong niadtong tuig 1997.

Ang tulo mao sila si Josman Aznar, Ariel Balansag ug Alberto Caño pinasikad sa Good Conduct Time Allowance (GCTA) Law.

Matud ni Chiong nga angay mokanaug sa katungdanan si Faeldon tungod kay ubos sa iyang responsibilidad ang panghitabo sa prisohan.

Gihulagway sa magtiayong Chiong si Faeldon nga baga og nawong nga gitugutan ang mga kriminal nga nakahimo og grabeng krimen nga makagawas ug wala tan-awa ang kahimtang sa mga biktima.

Daku ang pagtuo sa magtiayong Chiong nga adunay nalambigit nga kwarta sa paghatag og kagawasan sa mga akusado.

Nanghinaut ang mga Chiong nga tangtangon na gyud ni Presidente Rodrigo Duterte si Faeldon sa katungdanan ug dili na ibalhin og laing departamento sama sa unang kontrobersiya sa Bureau of Customs.

Ang magtiayon walay tinguha nga motambong sa Senate Blue Ribbon Committee ug ang mahinungdanon alang kanila nga prisohon pagbalik ang gipagawas nga mga akusado.

Gitataw sa magtiayon nga wala sila mahadlok sa mga akusado basta atubangon lang sila niini.

Si Dionesio niingon nga mas angay pa mahadlok ang mga akusado ilabi na nga daghan ang mga naglagot kanila ilabi na sa mga biktima nga nagpakahilom lang. Alang kang Thelma, angayan nga shoot to kill ang himoon ngadto sa mga akusado ilabi na nga ilegal kini sila nga nakagawas sa prisohan.

Moabot na sa 22  ka tuig ang nilabay ug sumad na sab sa adlaw nga natawhan sa iyang mga anak karong Septiyembre 8 ug 9 apan ang usa kanila ang hangtud karon wala pa gihapon igkita.

Si Cebu City Police Office director, Col. Gemma Cruz-Vinluan, nitug-an nga aduna na silay team nga nag-monitor sa mga akusado nga nakagawas ug nagpaabot sa kamanduan sa pagsikop kanila pagbalik. (/GMR)(BANAT NEWS)