Abogado gi-ambush nakabawos

CEBU, Philippines —  Nakalingkawas gikan sa tinong kamatayon ang usa sa mga inilang abogado sa Sugbo human gisuwayan pagbanhig sa riding-in- tandem apan nakabawos kini kanila gamit ang iyang armas kagahapon sa buntag.

Si Atty. Inocencio Dela Cerna igo lang nakaangkon og mga samad sa iyang bukton tungod sa nangabuak nga bildo sa bintana sa iyang sakyanan.

Gikan pa sa Qimonda Building sa Don Sergio Osmeña St. North Reclamation Area diin nahimutang ang Cebu City Hall of Justice ang biktima ug nagsakay sa iyang sakyanan sa paggawas sa compound pasado alas-9 sa buntag.

Samtang nagmaneho si Dela Cerna nakadungog kini og tulo ka buto ug nangabuslot iyang bintana. Hinungdan nga gipabulhot niya og padagan ang iyang sakyanan padung unta sa Waterfront Police Station sa may Plaza Independencia.

Apan iyang nakita nga gisundan kini sa mga gunmen hinungdan nga kalit siyang mihunong pag-abot sa may Pier 3 ug didto migawas siya sa sakyanan ug mibawos pagpusil sa mga mamumuno. Ang mga mamumuno daling nangikyas.

Si Police Chief Master Sergeant Ruth Violango, imbestigador sa Waterfront Police Station wala pay matumbok nga motibo sa maong pagpamusil ug kun kinsa kadtong nibanhig sa abogado.

Dunay onse ka mga buslot inagian sa bala ang sakyanan ni Dela Cerna diin kadaghanan sa bildo sa bintana sa driver side.

‘Wa mi ikasukol’

Usa sa mga gwardiya sa Qimonda ang mitug-an nga nakita niya ang paggawas sa sakyanan ni Dela Cerna ug may usa ka lalaki nga niduol sa sakyanan.

Sunod nalang niyang nadungog ang butobuto sa armas maong mihapa nalang kini. Nakita sab niya nga may motorsiklong mihapit sa gunman ug misakay kini dayon.

Ang mga mamumuno matod pa pulos nagtaptap ug nasul-ob og helmet nga dili full-faced.

“Naay usa ka police nga niaksyon og rescue niya naunhan man og pabuto sa gunman. Mao ‘to naay ni-backup laing police nakapadagan na ang gunman. Human kami sad ato nga tayma nidagan nalang pud mi kay gitutukan man mi og armas kay wa sad baya mi armas. Wa mi ikasukol mao ‘to nanagan nalang mi,” matud pa sa gwardiyang di buot magpaila.

High Profile Cases

Samtang wala pay gibutyag ang kapolisan bahin sa ilang imbestigasyon sa motibo, si Dela Cerna naghupot og mga high profile cases.  Apil sa mga gidepensahang kliyente ni Dela Cerna si kanhi Bohol Provincial Board Member Niño Rey Boniel kinsa suspek sa pagdagit ug pagpatay sa iyang asawa nga si Bien Unido Mayor Gesila Boniel; ug ang gipatay nga si Medellin councilor Ricardo Ramirez ug uban pa nga pulos dagkong mga kaso.

Isolated Case

Tungod sa nahitabo, gimandoan ni Mayor Edgardo Labella si Cebu City Police Office Director Gemma Vinluan nga butangan og police outpost ang Qimonda Building.

 “We’ve known each other as practicing lawyers. He’s a very good lawyer. When you are engaged in the private practice of law, there are two sides of the coin –one will be happy with you and the opposing part would not be happy,” sigon sa mayor.

Dugang sa mayor nga kinahanglan madakpan ang mga responsable ug maresolba ang maong kaso tungod pwede kining mahitabo sa ordinaryong mga tawo. Mipasalig hinuon siya luwas gihapong puy-an ang siyudad kay isolated case lang kini.

Samtang ang president sa IBP-Cebu City Chapter Atty. Regal Oliva, nibutyag nga gikondinar sa ilang pundok ang suway pagpatay sa ilang kauban sa buhat. Giawhag niya ang kapulisan sa pagsiguro nga luwas ang mga legal practitioners sa Sugbo ug paspasan ang imbestigasyon. Matud niya nga taas kaayo ang ilang pagsalig nga mopatigbabaw gihapon ang rule of law sa tanan panahon.

Sa pikas bahin, ang National Bureau of Investigation (NBI)-7 mohimo og linaing imbestigasyon sa maong hitabo matud pa ni NBI-7 Assistant Regional Director Atty. Dominador Cimafranca.

Ang NBI niadto dayon sa nahitaboan aron mopahigayon sab og inisyal nga imbestigasyon sa nahitabo kang dela Cerna. Matud niya andam silang moapil kun dunay joint investigation nga buhaton. (IBM) (BANATNEWS)