Limpyong merkado sa Mandaue gihigpitan

CEBU, Philippines — Higpit ang gipatuman nga lagda sa kalimpyo sa bag-ong gibuksan nga merkado publiko sa Dakbayan sa Mandaue ngadto sa mga manindahay.

Si Mandaue City Market Administrator Musoline Suliva niingon nga ang mga vendors nga masakpan nga dili manglimpyo ang kuhaan sa ilang permit sa pagpamaligya.

Matud ni Suliva nga sukad sa pagbukas sa bag-ong merkado niadtong Agosto 28, maoy ilang nasakpan ang 18 ka vendor nga napakyas sa pagtuman sa tukma nga paglabay sa basura.

Niadtong unang adlaw, adunay usa ka fish vendor ang gipatawag tungod sa tulo ka kalapasan ug gisundan kini sa laing 17 pa sa pagkasunod adlaw.

Gitataw ni Suliva nga ang makahimo og upat kahigayon nga kalapasan nga vendor ilang himoon ang pag-revoke sa permit niini.

Sagad sa kalapasan anaa dapit sa isdaan matud ni Suliva.

Hinoon kagadaghan nagmintinar gyud sa kalimpyo pinaagi sa pagbutang og kaugalingong basurahan sa ilang stall.

Tuyo sa kalimpyo mao nga ikapasigarbo ang bag-ong merkado ngadto sa mga dumuduong ug mobisita sa dakbayan. (/GMR)(BANATNEWS)