Ferry boat nitakilid sa pantalan
CEBU, Philippines — Ferry boat mitakilid sa pantalan human nakanaog ang mga pasahero niini sa Consuelo Wharf sa lungsod sa San Francisco sa Isla sa Camotes kagahapon sa hapon. Upat ka tawo ang naangol.
Ang mitakilid sa tuo nga bahin ug nasudlan og tubig mao ang MV Mika Mari 8 nga gipanag-iya sa Jomalia Shipping Lines.
Alas 2:30 sa hapon ang Coast Guard San Francisco niresponde sa pantalan ug nitabang pagpakanaog sa mga pasahero ug dunay upat ka pasahero nga nangaangol ug gidala sa tambalanan. Ang MV Mika Mari 8 nga gidala sa kapitan nga si Roger Capin adunay 149 ka mga pasahero, 18 ka crew, 11 ka rolling cargoes gikan pa sa Danao City.
Matud pa ni Lt. Junior Grade Michael John Encina, tigpamaba sa PCG Central Visayas ang MRRV 4406 BRP Sulian nibiya dayon sa Dakbayan sa Sugbo aron sa pagsusi sa lugar kauban ang composite team sa PCG Medical, Divers ug Marine Environment Protection Unit.
Samtang nagpadala na og oil spill booms aron panagang kun moawas ang bunker fuel niini ngadto sa dagat nga makaingon sa polusyon. (/IBM)(BANATNEWS)
- Latest
