Baha sa Batiller, Umapad masulbad na

CEBU, Philippines — Masulbad na ang pagbaha sa dalan Batiller sa Barangay Umapad, Dakbayan sa Mandaue.

Kini nunot sa pagpatuman na sa Department of Public Works and Highways sa mokabat P4.7 milyones nga road repair project ug ang pagpalawom sa kanal.

Matud ni Umapad Barangay Kapitan Nelson Rubio nga magsugod karong Septiyembre ang pagtrabaho diin sirad-an ang dalan Batiller sulod sa usa ka buwan.

Gitataw ni Rubio nga dungan sa pagsemento sa dalan maoy himoon ang pagpalawom sa nagtadlas nga kanal sa ingon nga paagi kahatagan og kasulbaran ang masinati nga pagbaha sa maong lugar panahon nga kusog ang pagbunok sa ulan.

Dugang pa ni Rubio nga ang gamay nga kanal sa dalan Batiller maoy nahimong suliran sa mga molupyo tungod kay kini sab ang agianan sa tubig gikan sa Barangay Alang-Alang paingon sa Mactan Channel.

Si Felix Suico, pangulo sa City Disaster Risk Reduction and Management Office, niingon nga ilang gipangandaman ang buwan sa Septiyembre hangtud ang mosunod nga mga buwan.

Kini gumikan kay niining mga buwana masinati ang kusog nga ulan nga maoy hinungdan sa mga pagbaha ug ang pagdahili sa yuta. (/GMR)(BANATNEWS)