Kaso sa SRP ipadayon ni Osmeña

CEBU, Philippines — Nagplano nga mopasaka og kaso si kanhi Cebu City Mayor Tomas Osmeña aron kwestiyonon ang pagbaligya sa 45.5 ektarya nga luna sa South Road Properties.

Kini ang gibutyag ni Konsehal Nestor Archival kinsa kaalyado ni Osmeña human gisibog ang parehong kaso sa kasamtangan nga administrasyon.

Matud ni Archival nga nakig-estorya siya kang Osmeña bahin sa mga butang nga gusto panalipdan ang interes sa siyudad.

“During the time nga siya pa ang mayor, the city government filed a case to resolve the legality of the sale but because ila mang gi-withdraw, so ilang gi-withdraw,” sigun niya.

Kahinumduman nga si Regional Trial Court Branch 23 Judge Ester Veloso niluwat og kamanduan nga nagtugot sa pag-atras sa petition for declaratory relief nga nagkwestiyon sa legalidad sa pagbaligya sa luna.

Ang petisyon gisang-at sa kanhi sakop sa City Legal Office hapon sa Hunyo 28 nga mao ang katapusang opisyal nga adlaw sa kanhi administrasyon batok sa SM Primeholdings, Inc., Ayala Land, Inc., Cebu Holdings, Inc., Filinvest Land, Inc., Filinvest Alabang, Inc., Cyberzone Properties, Inc., Anesy Holdings Corporation, IGold Holdings Incorporation, ug Betterfield Phils., Corporation nga nagpalit sa luna sa SRP niadtong 2015.

Sa pag-atras sa kaso, matud sa bag-ong City Legal Officer nga si Atty. Rey Gealon nga magamit sa kagamhanan sa siyudad ang salapi nga nakolekta gikan sa mga nipalit sa luna.

Apan matud ni Archival nga ang gobiyerno dili makagamit sa halin sa SRP tungod kay ang legalidad niini gikwestiyon pa.

Matud niya nga adunay daghang “mga depekto” sa transaksyon sama sa wala’y awtoridad nga gihatag sa Siyudad sa Sugbo sa Negotiated Sales on Installment; ang konseho sa siyudad nipasar sa usa ka resolusyon sa wala pa ipadayon ang proseso sa pag-bid sa mga luna sa SRP; ang konseho sa siyudad nipasar sa resolusyon nga nagpaundang sa dugang nga aksyon sa pagbaligya sa luna; ang Committee on Awards napakyas sa pagsunod sa standard nga pamaagi sa gobiyerno alang sa pag-post sa public bidding sa usa ka publiko nga lugar ug uban pa.

Apan matud ni Mayor Edgardo Labella nga ang iyang administrasyon nituo nga balido ug legal ang maong pagbaligya sa luna ug walay legal impediment nga gamiton sa siyudad ang kwarta nga nakolekta. (/GMR)(BANATNEWS)