Anak mohulip ni Teban sa konseho

CEBU, Philippines — Nitumaw na ang pangalan kung kinsa ang mohulip ni anhing Julian “Teban” Daan sa konseho Dakbayan sa Talisay. Kini human ang kapikas ni Daan nga si Bokal Yolanda Daan mao mismo ang nakabuhi og pamahayag ngadto sa mga tigbalita nga ang ilang anak nga si Lester ang mopuli sa amahan.

Apan si Mayor Gerald Anthony “Samsam” Gullas Jr. nipili lang una nga magpakahilom sa maong hisgutanan aron tiwason ang pagpahiluna sa patay’ng lawas sa ilang kauban.

“Naay talks and I have thoughts already but while mag-estorya mi sa mopuli moingon gyud ko stop it,” asoy pa ni Gullas.

Gusto sa mayor nga ipahiluna lang una ang lawas ni Teban aron sab sa pagrespetar sa pamilya. Hinuon kung maabot na ang panahon nga angay na kini estoryahan, iya unang pakig-estoryahan o konsultahon ang partido ug ang ilang mga lider.

Walay laing partido nga nidaug sa Dakbayan sa Talisay kun dili ang grupong Alayon ra.

Sa nasabtan ni Gullas nga sila sa ilang partido ang adunay katungod sa pagtudlo kun kinsa ang mopuli ni Teban ug ang pag-aprubar niini iya na ni Gobernador Gwendolyn Garcia. (GMR)(BANATNEWS)