Teban ilubong, trapik sa Talisay

CEBU, Philippines – Gipaabot ang pagdagsa sa mga tawo sa paglubong sa nabantog nga dramatorgo ug konsehal sa Siyudad sa Talisay nga si Julian “Teban” Daan karong adlawa.

Gipanglantawan ni Jonathan “Joy” Tumulak, traffic czar sa dakbayan, ang bagang duot sa trapiko sa kadalanan.

Ang misa ipahigayon alas 3 karong hapon apan ala 1 pa lang igawas na ang iyang patay’ng lawas gikan sa Talisay City Hall aron masayo og abot sa simbahan sa Sta. Teresa de Avila sa Barangay Poblacion.

Giawhag ni Tumulak ang katawhan nga kun walay importanteng lakaw sa Poblacion likayan nalang una kini.

Human sa Santos nga Misa ihatud ang patay’ng lawas ni Daan sa pribadong sam-ang sa Barangay Cansojong alang sa kapahulayang dayon.

Sigun pa ni Tumulak nga ang Barangay Cansojong ug Poblacion maoy likayan sa motorista aron dili mapiit sa trapiko karong adlawa.

Sa laing bahin, nitanyag ang kagamhanan sa dakbayan og libre nga lubong sa mga residente.

Si Mayor Gerald Anthony “Samsam” Gullas Jr. nisulod sa kasabutan tali sa duha ka punerarya aron maoy mohatag og serbisyo sa mga Talisaynon nga motaliwan sa laing kalibutan.

Uban sa konseho, nipirma si Gullas sa memorandum of agreement (MOA) ingon man sa kadagkuan sa Mt. Olive Eternal Life Corp. ug St. Francis Memorial Homes.

Matud ni Gullas nga kadtong mga kabanay nga walay igong salapi sa pagpalubong sa ilang minahal sa kinabuhi nga motaliwan dili na angay mabalaka tungod kay ang siyudad na ang moabaga niini ug  mohatag ang siyudad og P8 mil nga burial assistance.

Ang buot mopahimulos sa programa kinahanglan nga mosumiter sa barangay certificate of indigency, registered death certificate, funeral contract, valid ID sa nagproseso ug sa namatay nga nagpamatuod nga kini Talisaynon. Ang mga rekisitos adto isumiter sa buhatan ni Felipa Solana, pangulo sa City Social Welfare and Development Office.  (/GMR)(BANAT NEWS)