Pagpahaw-as sa septic tank sa CCJ ipadali

CEBU, Philippines – Human sa nadawat nga mga reklamo gihangyo ni Cebu City Councilor Nestor Archival ang executive department nga paspasan ang pag-hire og contractor nga mokuha sa hugaw sa tawo gikan septic tank sa Cebu City Jail.

Si Archival nibutyag nga ang siyudad nipaubos sa Barangay Kalunasan nga state of calamity aron matubag dayon ang problema sa baho diha sa lugar. Duha ka semana ang nilabay giaprobahan sa city council ang paggamit sa P19.5 milyones gikan sa mga pundo sa kalamidad.

Ang budget magamit kini sa pagpalit og duha ka truck nga nagkantidad og P8.44 milyones matag usa; P480,000 alang sa pag-dislodge sa mga septic tank; ug P1.97 milyon aron pagtabon sa mga kanal sa gawas sa prisohan.

Matud ni Archival nga kinahanglang iproseso sa siyudad ang P480,000 nga pag-dislodge sa  mga septic tank tungod kay kini ang pinakadali nga solusyon sa problema.

Si Archival mao ang chairman sa task force nga mosulbad sa maong problema ug si Konsehal Joel Garganera and vice chairman diin ang mga miyembro mao sila si Konsehal Eduardo Rama, Jr., Renato Osmeña, Jr., Alvin Dizon, Raymond Alvin Garcia, ug Jerry Guardo.

Samtang nag-proseso pa alang sa service provider, matud ni Atty. Gerardo Carillo, special assistant to the mayor nga hangyuon niya ang Department of Public Services sa siyudad nga mag-spray og deodorizer nga makawagtang sa baho. (/BDB)(BANAT NEWS)