Simbahan, kapolisan, militar nagtagbo

CEBU, Philippines – Nagtagbo niadtong Lunes ang mga regional commanders sa kapolisan ug militar kauban ang kaobispohan sa Diocese of Bacolod alang sa Church and Military and Police Forum.

Kini may kalabutan sa kahimtang sa Negros Island diin gituki ang mga importante nga mga butang.

Matud ni Bishop Oscar Jaime Florencio, Bishop of the Military Ordinariate of the Philippines, nga ang ilang tigum sa CMP Forum unang higayon kadto sa Visayas.

Sumala pa ni Florencio nga usa sa mga nigawas nga problema atol sa forum ang kakabus nga wala mahatagi og pagtagad.

Nasabotan atol sa forum nga magtinabangay ug magkahiusa aron mahatagan og pagtagad ang mga kabalaka ug kahadlok sa katawhan ilabi na ang sunod-sunod nga pagpamatay sa Negros Island.

Si Florencio nitug-an nga ang maong tigum nahitabo sa Bacolod tungod kay aduna man silay kanhi Church and Military and Police Advisory Group nga gi-reactivate nila ngadto sa CMP Forum. Dugang ni Florencio nga sinsero ang tanan alang sa malungtaron nga kalinaw sa Negros nga wala nay makalas nga kinabuhi.

Ang obispo niawhag sa katawhan nga kanunay gihapon ilakip sa mga pag-ampo alang sa kalinaw sa nasud. (/GMR)(BANAT NEWS)