P7 milyon sa ID system gidebatihan

CEBU, Philippines – Gidebatihan sa konseho sa Siyudad sa Sugbo ang gisugyot nga P7 milyones nga gahin alang sa bag-ong sistema sa ID sa 300,000 ka marginal sector sa siyudad.

Atol sa budget hearing kagahapon, si Konsehal Franklyn Ong kinsa mao ang presidente sa Association of Barangay Councils sa siyudad, nikwestiyon sa guidelines sa mga kwalipikadong benepisyaryo sa programa.

Sigun niya nga ang mga opisyal sa barangay kinahanglan nga masayud tungod kay sila man ang mohatag sa barangay clearance nga kinahanglan sa pag-avail sa mga programa sa siyudad.

Apan matud ni Atty. Jose Daluz III, special assistant to the mayor, nga ang bag-ong sistema sa ID magtugot sa mga benepisyaryo nga magamit sa mga programa sa siyudad nga dili na kinahanglan ang ubang requirements.

Siya niingon nga si Mayor Edgardo Labella mag-umol og komitiba nga langkuban sa ABC, Sangguniang Kabataan, Department of Social Welfare and Services, ug uban pa aron ipatuman ang programa.

Kun wala ang sistema sa ID, si Daluz niingon nga ang usa ka residente kinahanglan nga makakuha og mga kinahanglanon sama sa sertipiko sa mga botante, clearance sa barangay, ug uban pa. Gipasabot ni Daluz nga ang P7 milyones alang kini sa software nga gamiton sa ID system.

Ang mga marginal sector nga giila mao ang grupo sa kababayen-an, tigulang, solo parents, ug persons with disabilities tungod kay aduna na silay organisasyon.

Ang ID system tubag sa kabalaka nga dunay mga dili residente sa siyudad ang mopahimulos sa serbisyo ug mga programa sumala pa ni Daluz.

Gipasalamatan ni Konsehal Philip Zafra ang executive department sa pagpahimutang sa programa labi na nga ang pipila ka residente sa mga barangay nagproseso sa susamang kinahanglanon aron magamit sa lainlaing mga programa ug serbisyo.

Dugang ni Daluz nga himoon ang pre-registration sa mga benepisyaryo sa mga barangay. (/GMR)(BANAT NEWS)