Bawal ang maghubog-hubog atol sa Pasigarbo sa Sugbo
MANILA, Philippines — Gihangyo ni Cebu City Mayor Edgardo Labella ang Cebu City Police Office nga ipatuman ang ordinansa nga nagdili sa paghuboghubog karong adlawa alang sa usa ka malinawon nga pagpahigayon sa Pasigarbo sa Sugbo karong adlawa.
Giingon sa mayor nga nagpadala siya usa ka suwat kang CCPO Director Police Colonel Gemma Vinluan niadtong Biyernes aron pagdakop sa mga malapason sa City Ordinance No. 1929 sa panahon sa Pasigarbo sa Sugbo.
“What is City Ordinance No. 1929? To prevent people from drinking liquor during the festivity,” sigon niya. Sama kini sa gipatumang liquor ban matag Sinulog kada tuig.
Giingon ni Labella nga libuan ka mga tawo ang magpundok sa syudad aron masaksihan ang kalihokan nga giisip nga piyesta sa tanan nga kapistahan. Ang kalihokan himuon sa Cebu City Sports Center.
Kun adunay daghang mga tawo, sigon ni Labella nga delikado kun maghuboghubog kini ug makagubot sa maong kalihokan.
Dugang niya nga ang pagdili sa paghuboghubog sa mga pampublikong lugar ipatuman gikan sa 11 sa buntag hangtod alas 12 sa tungang gabii karong Domingo.
Ang probinsya nagpaabot usa ka dakong panon ang motambong sa kalihukan.
Ang mayor usab mihangyo nilang Guadalupe Barangay Kapitan Michael Gacasan, Capitol Site Kapitan Manuel Guanzon, Sambag 1 Barangay Kapitan Ailien Guardo, Sambag II Barangay Kapitan Ryan Aznar ug Calamba Barangay Kapitan Victor Quijano nga ipang deploy ilang mga barangay tanod karon.
Sigon ni Labella nga ang pagbutang sa mga barangay tanod dili lamang usa ka pagdugang sa pwersa sa pulisya apan usa usab ka alang sa pagdumala sa dagan sa trapiko tungod adunay pag-usab sa mga ruta sa dyip. (/IBM)(BANATNEWS)
- Latest
