Sakyanan nga pataka og parking sa Lapu-Lapu guyoron

CEBU, Philippines — Gipahibalo ni Mayor Jonard Ahong Chan sa Dakbayan  sa Lapu-Lapu  nga mohimo usab sila sa paghawan sa daplin sa kadalanan sa siyudad.

Matud ni Chan nga guyoron nila ang mga sakyanan nga magpataka og parking isip kabahin sa paghawan sa daplin sa kadalanan.

Ang mga tag-iya og estraktura nga nilapas sa agianan padalhan kini og pahimangno sa paghawan diha sa lugar sulod sa duha ka adlaw. Gibutyag ni Chan nga duha  ka grupo nga langkuban  sa kapolisan sa Lapu-Lapu City  Police Office (LLCPO) ug  City  Traffic  Management System  (CTMS) molibot sa tibuok dakbayan sa pagpahibalo ngadto  sa mga tag-iya sa mga estraktura nga nakaali sa sidewalk o karsada.

Kagahapon gisugdan na ang pag-isyu sa mga notice alang sa mga tag-iya sa mga estraktura nga nakahimo og kalapasan.

Nunot niini, gipahibalo ni Chan nga adunay duha ka tow truck nga gamiton sa pagguyod sa mga sakyanan nga ilegal nga nag-parking.

Gipasabot  ni Chan  nga ang paghawan  sa mga daplin  sa kadalanan maoy pagsanong sa kamandoan sa  Department of Interior and Local Government (DILG)  pinaagi sa giluwatan nga memorandum circular  niadtong Hulyo  29 nga naghatag lamang og  60 ka adlaw nga ultimatum sa mga  local chief executive sa paglimpiyo sa kadalanan.

Kini tubag usab sa DILG  kang  President Rodrigo Duterte nga nananawag ngadto sa  local chief executives sa pagbalik ngadto  sa publiko sa kadalanan. (/BDB)(BANATNEWS)