Babayeng molayat unta sa taytayan naluwas

CEBU, Philippines — Naluwas sa miaging gabii  sa nagbantay nga sakop sa kapolisan sa Mandaue City Police Office (MCPO)  ang usa ka 28 -anyos nga babaye nga giingong akto untang molayat gikan sa Marcelo  Fernan Bridge sa habig sa Barangay  Umapad sa Dakbayan sa Mandaue.

Si Police Colonel  Jonathan   Abella nga maoy direktor  sa kapolisan sa MCPO  ang mikumpirnar nga nasigpatan sa nagbantay nga mga polis ang maong babaye nga naghilak nga nagdagan paingon sa tungatungang bahin sa maong taytayan.

Matud pa nga gisundan kini dayon sa mga polis ug sa dihang nitungtong kini sa railings dali kini nilang gipugngan ug ilang giam-aman niini.

Sumala pa ni Abella ang babaye kansang pangalan wala ibutyag miasoy nga may problema kini sa pamilya.

Gitug-an ni Abella nga gihatod sa mga polis  sa MCPO ang maong babaye ngadto sa ilang panimalay human  sa ilang gihimo nga pag-am-am niini.

Tungod sa mga insidente sa paghikog pinaagi sa paglayat gikan sa Mandaue –Mactan Bridge ug Marcelo Fernan Bridge sa nanglabay nga mga semana, ang kadagkoan sa kapolisan nakadesider sa pagbutang na og ma polis nga mobantay aron mapugngan ang mga gustong maghikog.

Si Lapu-Lapu City Mayor Junard “Ahong” Chan buot nga apilon sa hilisgutanan sa umaabot nga tigom sa Mactan Cebu Bridge Management Board (MCBMB) uban ni Cebu  Governor Gwendolyn  Garcia ang maong mga panghitabo.

Dugang pa ni Chan  nga iyang isugyot sa MCBMB nga butangan og mga tawong mobantay sa mga monitors sa closed-circuit television (CCTV) camera ang duha ka taytayan.

“Kanang nag-monitor sa CCTV under na sa bridge board. Ang iyang trabaho kana ra gyud ang pagmonitor,” nagkanayon si Chan.

Sama sa Mandaue, gimando sab ni Chan ang pagbutang og mga polis sa maong mga taytayan diha sa ilang hurisdiksyon. (/IBM)(BANATNEWS)