CEO sa pyramiding scam gipatay

CEBU, Philippines — Giilang chief executive officer sa pyramiding scam ang napalgang patay ug gibinaklid og gapos daplin sa Transcentral Highway sa Barangay Cansumoroy, Balamban alas 9 sa gabii niadtong Martes.

Ang biktima nailhan nga si Armando Bernaldez Oppus, 34-anyos, ug lumad nga taga Davao City.

Sa report sa kapolisan, sa ilang pagresponde sa dead person alarm alas 9:40 sa gabii naabtang wala nay kinabuhi ang biktima nga anaa sa daplin sa karsada sa Sitio Buli nga gitabunan og boxer shorts ang nawong sa biktima.

Adunay samad pinusilan sa iyang ulo ug ubang parte sa lawas ang maong biktima samtang upat ka kabhang sa kalibre .45 ang napalgan sa crime scene.

Ang hepe sa Balamban Police Station nga si Police Major Christian Torres nibutyag nga pipila ka minutos human sila kadawat og dead person alarm kagabii, nakadawat sab sila og alarma nga adunay nahulog ug nasunog nga sakyanan sa pangpang sa Barangay Sunog, silingang barangay sa Cansumoroy.

Sa crime scene giingong nangalagpot ang lisensya ug mga IDs sa biktima maong wala kini naapil sa sunog.

Kini ang hinungdan nga natumbok sa kapolisan nga ang nasunog nga sakyanan iya sa biktima.

“Gitan-aw namo ang picture sa mga ID, pareha man og nawong sa biktima, so dakung posibilidad nga connected to, iyaha to nga sakyanan,” sigun sa hepe.

Walay nakuha nga mga saksi sa lugar diin nakaplagan ang biktima apan didto sa Barangay Sunog giingong usa ka barangay tanod nga duty sa barangay outpost ang nakakita nga adunay tulo ka sakyanan nga nisulod sa ilang barangay pasado alas 9 sa gabii.

Usa ka van nga puti, usa ka pick-up nga itom ug usa ka Isuzu Mux nga sports utility vehicle ang maong mga sakyanan.

“Gatuo ra sad ang tanod nga mag-camping sa taas kay basta (bisperas) holiday naa man gyuy mag-camping diha,” si Torres nagkanayon.

Sa paggawas, matud pa nga ang van ug ang pick-up na lang ang nakit-an.

Namatikdan na lang sab nila nga nagkayo nga natagak sa pangpang sa Sitio Cambagocboc ang Isuzu Mux.

“Posible nga gibiyaan usa ang lawas unya gisunog ang sakyanan o kun di gani bali, ato pa nang imbestigahan,” sigun sa maong hepe.

Usa sa mga motibo nga gitan-aw sa kapolisan mao ang gipamasangil nga nalambigit sa estafa ang biktima.

Butyag sa hepe nga nakadawat sila og impormasyon nga CEO sa usa ka money pyramiding scam sa Davao ang biktima ug nisibat kini niadto pang Hulyo karong tuiga.

Giingong aduna kini kasong large scale estafa kauban ang laing duha ka kakunsabo niini apan giklaro sa hepe nga ila una kining iagi og beripikasyon.

Niining pagsuwat, ang biktima anaa gibutang sa Gemma Funeral Homes ug giingong wala pay kabanay nga nikuha sa patayng lawas. (/GMR)(BANATNEWS)