Mayor naghuwat sa legal opinion

CEBU, Philippines – Si Cebu City Mayor Edgardo Labella hugot sa iyang baruganan sa desisyon niini nga ihatag ang mga bugas ngadto sa biktima sa sunog ug kapolisan diin alang unta ang maong mga bugas sa mga drayber sa habal-habal.

Hinuon gihangop ni Labella ang lakang sa legislative body sa pag-refer ngadto sa City Legal Office alang sa mga komento ug rekomendasyon niini.

“Among gipanghatag sa habal-habal, pero ang sobra among ihatag sa polis otherwise ma-rot, madaot na maong among gipanghatag. Kay otherwise madaot na or it will become useless, dili na fit for human consumption”, pasabot ni Labella.

Kahinumduman nga gikwestiyon nila ni Konsehal Nestor Archival ug Lea Japson ang  plano sa executive department nga ang mga wala mahatag nga mga bugas alang sa mga drayber sa habal-habal igahin kini sa mga biktima sa sunog ug kapolisan.

Ang mga konsehal nga kaalyado sa oposisyon nabalaka nga ang mga opisyal mahimong mapasakaan og kasong technical malversation o ilegal nga paggamit sa pundo.

“Dili na technical malversation. Otherwise, malate, madunot. Tugotan nimo nga madunot?”, matud ni Labella.

Si Labella nagkanayon nga maghulat siya sa legal nga opinion sa City Legal Office.

Sayo pa, si Atty. June Maratas nagkaayon nga sa ilang pagbisita sa niadtong bulan diha sa bodega sa South Road Properties adunay 291 ka sakong bugas nga nagpabilin nga wala ma-apod-apod. Matud ni Maratas nga ang maong mga bugas kabahin kini sa 6,000 ug 1,500 ka sako nga bugas nga gipalit sa Peace and Order Program nga ipanghatag sa mga drayber sa Angkas. (/BDB)(BANAT NEWS)