Kolorum sa Talisay pakuhaon og prangkisa
CEBU, Philippines — Aron mahimong legal ang pagpamasahero, gitambagan ang mga drayber ug operator sa pribadong sakyanan nga mokuha og prangkisa ug mag-umol og kooperatiba.
Kini maoy tambag ni Land Transportation Franchising and Regulatory Board 7 Direktor Eduardo Montealto sa gihimo nga diyalogo sa kapin 60 ka drayber ug operator sa Talisay City Hall.
Natigayon ang tigum human si Mayor Gerald Anthony “Samsam” Gullas Jr. pinaagi ni Jonathan “Joy” Tumulak, ang traffic czar sa sakbayan, nagsilbing taytayan sa duha ka habig. Una niini, gipasidan-an na ang mga kolorum nga sakyanan nga sila pangdakpon gyud sa mga sakop sa City of Talisay-Traffic Operation Development Authority (CT-TODA) human sila nakadawat og reklamo pinaagi sa 8888 hotline sa ilang presensya.
Si Montealto niingon nga usa sa butang nga iseguro sa mga drayber ug operator mao ang pag-angkon og bag-ong van aron makapamasahero kay ubos man sab kini sa programa sa Department of Transportation.
Ang kagamhanan sa Siyudad sa Talisay nisaad nga maoy mokantak sa Cooperative Development Authority aron mapasabot ang mga drayber ug operator sa pag-umol og kooperatiba.
Apan samtang nagproseso sila sa mga dokumento gidili gyud sila sa pagpamasahero sama sa ilang gibuhat sa mga niaging adlaw.
Si Tumulak nagkanayon nga dili sila magpanuko sa pagdakop ug irekomendar sa LTFRB sa mga malapason kay sila gipasidan-an naman daan. (/GMR)(BANATNEWS)
- Latest
