Kakunsabo sa tulis nadakpan

CEBU, Philippines – Mga suspek nga nanulis sa head guard kinsang nagdala sa payroll nasikop na sa kapolisan  didto sa Consolacion us aka adlaw human sa krimen.

Nasayran nga niadtong Martes sa hapon, Agosto 13, gitulis ug gipusil sa riding-in-tandem ang head guard sa Sarsalejo Security Agency nga si Edwin Velos.

Apan giingon nga sa dihang paingon na manibat ang duha kalit silang gipamusil sa wala pa gihapon mailhing tawo sumala pa sa kapolisan.

Nadala sa mga suspek ang motorsiklo sa biktima diin nga gisudlan sa P300 mil nga kwartang pangsweldo unta sa mga gwardya.

 Samtang napatay ug nahabilin sa crime scene si ex-Police Corporal Jobie Antipolo, kinsa dugay na nga nag-awol sa serbisyo.  Siya maoy nagmaneho sa motorsiklo.

Nagduda ang kapolisan nga inside job ang maong krimen sanglit kanhi gwardya sa maong security agency ang gitumbok nga utok sa krimen.

Sa follow up operation, niadtong adlaw nga Miyerkules nasikop silang Mark Ungaria Vergara ,28, kanhi gwardiya sa maong security agency ug graduating student sa kursong Criminology nga taga Casili, lungsod sa Consolacion ug ang kaubang si Rico Acosta ,38, intelligence officer sa usa ka mall sa Dakbayan sa Sugbo ug residente sa San Vicente, Liloan.

Samtang mitahan sa kapolisan nga giingong gibinlan sa kwarta nga si Pepe Arila Acosta, 48, uyoan ni Rico, usa ka habal-habal drayber, taga Maglasang, Consolacion.

Sigun pa sa imbestigador sa Labangon Police Station nga si Police Staff Sergeant John Eric Samosa nga ang duha maoy nagsilbing look-out sa pagpanulis.

Giingong gawas sa mga text message nga ilang nakuha gikan sa cellphone sa namatay’ng si Antipolo, nakit-an si Vergara ni Velos sa dihang nahitabo ang krimen. Managkaila ra ang duha kay iya kining kauban kaniadto.

 Si Vergara nadakpan diha sa iyang panimalay niadtong Myerkules sa kaadlawon ug kini maoy nitug-an kinsa iyang mga kauban.

Si Pepe Acosta natumbok kay diha sa u-box sa motor nga gimaneho ni Antipolo ang iyang lisensya ug ubang mga dokumento.

Sa kapin P300 mil nga dala ni Velos, dul-an P192 mil na lang ang gitahan niini.

Ang mga suspek kusganong mihimakak og kalambigitan sa maong krimen.

Ang gitumbok nga mastermind nga si Vergara miingon nga didto siya sa eskuylahan dihang nahitabo ang krimen apan miangkon siyang dugay na silang kaila ni Antipolo kay silingan sila sa Barili.

Matud ni Vergara nga mi-resign siya pagkagwardya tungod maoy gusto sa iyang asawa kay nagtrabaho siya ug nag-eskuyla.

Matud sa imbestigador nga sa ilang imbestigasyon mitumaw nga dunay laing tawo nga namusil nilang Antipolo.

Sa laing bahin, ang hepe sa Labangon Police Station nga si Police Major Henrix Bancoleta nagkanayon nga wala gihapon nila gisalikway ang anggulo nga posibleng aduna pay laing nasayod sa ilang plano maong gisuwayan sila pagpusil aron makuha ang kwarta.

 Gihimakak sab sa maong hepe nga polis ra sab ang namusil sa mga suspek sanglit wala silay police personnel sa maong lugar dihang nahitabo ang krimen. (/IBM)(BANAT NEWS)