Gipaabang ni Davide sa luna sa IT Park mohawa

CEBU, Philippines — Dili na mamugos ang usa ka locator sa IT Park, Siyudad sa Sugbo sa pag-abang sa luna nga iya sa kagamhanan sa Lalawigan sa Sugbo isip ilang parking  area.

Kini ang nakaaghat kang Bokal John Ismael Borgonia sa pagbakwi sa iya unta giduso nga resolusyon sa pagtugot kang Gobernador Gwendolyn Garcia nga mopasaka og kaso batok sa maong kompaniya.

Nasayran nga ang contract of lease tali sa Kapitolyo ubos sa administrasyon ni kanhi gobernador ug karon Bise Gobernador Hilario Davide III ug sa kompaniya ang wala moagi sa Provincial Board.

Ang kompaniya nag-abang kini sa 849 metro kwadrado nga luna sa Kapitolyo sa Barangay Lahug sa tag P50 matag metro kwadrado o dili moubos P42 mil ang matag bulan.

Ang Kapitolyo ubos sa administrasyon karon ni Garcia nipapahawa sa kompaniya gikan sa maong luna diin sila gihatagan og pito ka adlaw aron mohawa.

Si Borgonia nibakwi sa iyang resolusyon human nasayran nga niadtong Biyernes sa hapon nakatubag ang kompaniya sa suwat sa gobernador.

Matud ni Borgonia nga nisaad ang kompaniya nga mohawa sa maong luna ug dili na ipamugos pa ang kontrata nga unang napirmahan sa niaging administrasyon.

"I am taking this opportunity to inform the Province of Cebu that we are surrendering possession of the property in question.

At the present, the company has decided not to act in contention to your intentions," pagbasa sa sulat sa chief operating officer sa kompaniya.

Nunot niini makalingkawas na sab ang maong kompaniya sa kaso nga ipasaka unta sa Kapitolyo batok kanila. (Le Phyllis F. Antojado/GMR)