Sakop sa frat gitabangag patay

CEBU, Philippines — Gikatahong miyembro sa fraternity patay dihang gitabangan og kulata ug gidunggab pa mga membro sa laing fraternity diha sa Barangay Poblacion, lungsod sa Compostela niadtong Sabado sa kaadlawon.

Ang nakalas giila sa kapolisan nga si Lenie Noval, residente sa Barangay Basak, Compostela.

Matud pa ni Police Corporal Roland Alo, desk officer sa Compostela Police Station nga sa inisyal nga pakisusi, mikaon sa usa ka barbekyohan ang biktima uban sa iyang mga higala.

Paingon na unta sila mopauli sakay sa iyang motorsiklo apan gibabagan ug gialirongan sila og dili momenos napulo ka mga lalaki.

Wala na maka-abante pa ang biktima sanglit kalit kining gitabangan og kulata sa maong mga lalaki. Nakadagan pa unta kini apan gigukod siya hangtud nga nadagma ug naabtan sa mga  mamumuno.

Diha na dayon kini gidunggab sa mga mamumuno ug naigo kini sa dughan. Dihang nagkadugo na kini daling nanagan ang mga lalaki.

Nagtaop pa sa lawas sa biktima ang kutsilyo nga gigamit sa pagdunggab kaniya sa dihang gikarga kini sa ambulansya sa maong lungsod paingon sa Cebu Provincial Hospital didto sa Dakbayan sa Danao apan wala na kini makaabot nga buhi didto.

Sa imbestigasyon sa kapolisan adunay mga nakasaksi ug nakaila sa mga mamumuno apil na sa midunggab sa biktima.

Ang gitumbok nga nidunggab mao si Joshua Canlas ,27, residente sa Sitio Seafront, Barangay Poblacion sa maong  lungsod kinsa dali sab dayong nasikop sa gihimong hot pursuit operation diha na sa Barangay Inayawan sa Cebu City human kini daling nisibat pagkahuman sa krimen.

“Nailhan siya (Canlas) kay taga diha ra man siya. Naay nakakita gyud sa pagdunggab ni Canlas,” sigun pa ni Alo.  Gibutyag sa maong polis nga mga sakop og fraternity ang biktima ug ang mga suspek ug kini karon ang ilang gitutokang posibleng motibo sa krimen.

“Ang estorya membro sa fraternity ang gipatay, ang nagpatay lahi nga fraternity pud, imbestighan pa pero daghan nag-ingon nga na-tripingan sa mga suspek ang biktima,”dugang pa ni Alo apan wala kini mobutyag unsa nga mga fraternities ang nalambigit.

Sa pagukay sab sa background sa dinakpang suspek, si Alo nagkanayon nga bag-o pa kini nakapiyansa ug nakagawas gikan sa prisohan niadtong 2018 tungod sa kasong attempted murder nga nahitabo niadtong tuig 2011.

Karon, nadugangan ang kaso ni Canlas ug apilon sa pasakaan og kasong murder ang iyang mga kauban nga nikulata sa biktima.

Sa laing bahin, nahinabi sa Banat News ang usa sa kabanay sa biktima nga subo gyud sila sa nahitabo ilabi na nga dunay lima ka gagmay nga mga anak ang biktima. (Romeo Limpangog/IBM)(BANATNEWS)