Ilawom sa flyover sa Tabunok nahawan na

CEBU, Philippines — Gihangop ni Mayor Gerald Anthony “Samsam” Gullas, Jr. sa Siyudad sa Talisay sa nakitang paghawan diha sa ilawom sa flyover sa Barangay Tabunok.

Ang City of Talisay-Traffic Operation Development Authority (CT-TODA), market authority ug Talisay City Clearing Team naghiusa kini ug nihangyo sa mga drayber sa traysikol, vendor ug uban pa nga niukopar sa karsada diha sa maong lugar.

Si Jonathan “Joy” Tumulak, hepe sa CT-TODA nagkanayon nga usa sa hinungdan sa paghawan tungod kay nagamit na ang parkingan sa merkado sa Tabunok.

Ang mga traysikol nga mobiyahe sa Barangay Lagtang, Jaclupan, Lawaan, Pooc ug Biasong naa na maghuwat og pasahero diha sa parkingan sa merkado.

Gawas niini, wala nay gitugotan nga mamaligya diha sa daplin sa karsada hinuon ang mga vendor nga mamaligya diha daplin sa karsada gipahimutang sila diha kilid sa parkingan sa traysikol.

Posible usab nga isunod nga ideklara nga discipline zone ang Barangay Tabunok.

Kini human sa malampuson nga unang semana sa Barangay Poblacion nga maoy pilot barangay sa maong programa.

Sa laing bahin, si Police Major Orlando Carag, Jr., hepe sa Talisay City Police Station nagkanayon nga dali nga mo mingaw ang Poblacion ilabi na sa pagtong-tong sa alas 10:00 sa gabii.

Matud ni Carag nga napahibawo na ang katawhan sa ilang programa ug nituman usab kini.

Ang mga menor de edad sayo na nga mosulod sa ilang panimay ug menus na usab ang makita nga mag-inom og ilimnong makahubog diha sa daplin sa karsada. (/BDB)(BANATNEWS)