Kolurom nga motorbanca gidakop

CEBU, Philippines — Usa ka motorbanca ang gisikop sa Philippine Coast Guard Special Operations sa may Shell Island sa Cordova  niadtong adlaw nga Biyernes human nisungasong paglawig ug nagkarga og pasahero ug isda padung sa Pasil Fish Port sa Dakbayan sa Sugbo bisan og gidid-an ang paglawig tungod sa kadautan sa panahon.

Matud pa ni Lt. Junior Grade Michael John Encina, tigpamaba sa Coast Guard, ang gisikop mao ang MB Mon Jin nga gipanag-iya ni Ferdinand Camacho nga adunay duha ka crew ug sakay ang 20 ka mga pasahero.

Human naabtan ang maong Bangka, gipabalhin dayon ngadto sa ilang barko ang tanang sakay niini ug gimandoan ang kapitan niini sap ag-report ngadto sa buhatan sa PCG alang sa himuong imbestigasyon.

Sumala pa ni Encina, base sa imbestigasyon gikan pa sa Barangay Nasingin, Getafe sa Bohol ang maong Bangka. Gawas sa 20 ka pasahero, nagkarga sab kini og 20 ka mga kahon sa klase-klaseng isda aron dad-on sa Pasil.

Nasuta sab nga dili rehistrado ang maong motorbanca hinungdan giisyuhan kini og Enforcement Inspection Apprehension Report ug gidetiner ang sakayan diha sa Pasil Fish Port.

Ang Coast Guard Central Visayas padayon nisuspenso sa mga sakayan nga ubos sa 250 gross tons tungod sa giluwatan nga gale warning sa PAGASA. (/IBM)(BANATNEWS)