Mga trabahente sa pansitan, bihonan nagpatabang
CEBU, Philippines — Nagpanon ang kapin 20 ka trabahante sa pabrika sa pansit ug bihon sa City Social Welfare Office sa Dakbayan sa Talisay aron magpakitabang niadtong Biyernes sa buntag.
Kini human gihatagan og closure order ang kompaniya sa pansitan ug bihonan dihang nasayran ang daghang kalapasan sa ilang sanitation, drainage ug setback.
Usa sa mga trabahante nga si Francisco Anito niingon nga nagguol siya gumikan sa panghitabo sanglit mao kini ang gisaligan aron mapakaon ang iyang pamilya.
Ang pamahayag ni Anito gidasonan sa tanang trabahante apan nanguli nga walay nadala tungod kay kinahanglan pa man nila isumiter ang mga rekisitos aron mahatagan og pinansiyal nga hinabang.
Kini sama sa barangay certificate, certificate of employment ug ID sa mga trabahante.
Gipasabot ni Felipa “Beth” Solana, pangulo sa CSWO, nga ila pa sab nga tukion sa mayor kun pila ang ilang ihatag nga pinansiyal nga ayuda sa mga naapektuhang trabahante.
Ang kalapasan sa kompaniya unang nautingkay gumikan sa ilang pagpalit og coal o uling nga nasita sa taga Department of Energy (DOE).
Ang maong kompaniya nahimutang sa Barangay Cansojong, Dakbayan sa Talisay. (/GMR)(BANATNEWS)
- Latest
