374 ka kawani sa Lapu-Lapu negatibo
CEBU, Philippines — Nikabat sa 374 ka kawani sa city hall sa Dakbayan sa Lapu-Lapu lakip na si Mayor Jonard Ahong Chan ang negatibo sa gipahigayong kinalit nga drug test niadtong Lunes.
Ang mga kawani nga nipaubos sa drug test gilangkuban kini sa 43 ka regular ug co-terminus ug 331 ka job order diin uban kanila nadestino sa clean and green.
Si Garry Lao, pangulo sa Anti-Drug and Substance Abuse Council (ADAC) sa maong dakbayan nipadayag og kahinangop sa nigawas nga resulta sa nahisgutang drug test.
Matud ni Lao nga usa sa mga rekisitos alang sa pre-employment sa kagamhanan mao ang pagpaubos sa drug test sa aplikante.
Si Lao nibutyag nga atol sa kinalit nga drug test adunay wala makaapil niini tungod kay absent kini sa maong adlaw.
Ang maong mga kawani nga wala makaapil sa gipahigayong drug test pasumitihon og eksplinasyon sa hinungdan sa ilang pag-absent sa trabaho.
Nunot niini, si Lao nagkanayon nga mapaubos gihapon unya sa kinalit nga drug test ang maong mga kawani nga absent atol sa laing schedule.
Dugang ni Lao nga si Chan nagplano sa pag-outsource sa sunod nga drug test aron mawagtang usab ang mga pagduda sa ilang gipasiugdahan nga drug test. (BDB) (BANAT NEWS)
- Latest
