Paggamit og cellphone atol sa klase gidili sa Barili

CEBU, Philippines – Gidili na ang paggamit og mga cellular phone atol sa klase diha sa mga eskwelahan gikan elementarya hangtud sa high school sa Lungsod sa Barili.

Ang Sangguniang Bayan sa Lungsod sa Barili  nipasar og ordinansa sa pagdili sa mga tinun-an nga mo gamit og cellphone atol sa oras sa klase.

“Cellular telephones and similar communication devices shall be strictly banned to be used by students inside the classroom during class hours”, tipik sa Ordinance No 01-2019 nga gipangamahan ni Konsehal Ana Maria Ewican, chairman sa committee on education.

Ang SB nasayod nga ang cellphone makatabang kini sa mga tinun-an tungod kay magamit kini sa pag-contact sa ilang mga ginikanan ug adunay mga application sa cellphone nga makatabang sa pagtuon sa tinun-an sama sa dictionary.

Apan dili usab kalikayan nga sa cellphone adunay mga nabutang nga dili maaayo sa mga tinun-an.

Ang tinun-an nga makalapas sa ordinansa mamahimong m apahimangnoan sa magtutudlo sa unang kalapasan;  sulatan og pahimangno ang ginikanan sa ikaduhang kalapasan ug ang ika tulong kalapasan mamahimo na nga imbargohon ang cellphone sa bata ug ibalik kini ngadto sa ginikanan.

Ang maong ordinansa gi-refer sa committee on basic education sa provincial board. (/BDB)(BANAT NEWS)