Cebu Ocean Park buksan sunod buwan

CEBU, Philippines – Gihangop ni Cebu City Mayor Edgardo Labella ang pagbukas sa bag-ong atraksyon sa siyudad nga mao ang Cebu Ocean Park sunod buwan.

Kagahapon nahimamat ni Labella ang nagdumala sa Cebu Ocean Park nga giingong unang world-class nga marine theme park ug premiere nga pasilidad sa edukasyon ug kalingawan sa Visayas ug Mindanao diin makita ang mga buhi sa kadagatan sa Pilipinas ug sa Southeast Asia.

Ang mayor niingon nga adunay ubang industriya nga makabenepisyo sa pag-abli sa Ocean Park sama sa transportasyon, hotel, ug uban pa tungod kay managhan ang mga turista.

Si Labella nihangyo sa tagdumala sa pagpili sa mga residente sa dakbayan nga patrabahoon tungod kay ang kompanya nagkinahanglan og 200 ngadto sa 300 ka trabahante lakip na ang mga tigbantay sa mananap.

Ang Ocean Park aduna’y usa ka Oceanarium nga adunay feature nga acrylic enclosure aron makita palibot ang main lagoon, stingray encounters, sea lion ug bird shows, ug penguin, jellies ug insect exhibits.

Ang pagtukod sa one-hectare nga park nagsugod sa Pebrero 2016.

Makigtambayayong sab ang tagdumala ngadto sa Department of Education aron ang mga estudyante mobisita sa pasilidad ug m akakat-on sa marine life ug ubang butang.

Ang lugar diin ang Cebu Ocean Park gitukod gipanag-iya sa SM Supermalls apan ang Cebu Sealife Inc. nag-abang sa propriedad.

Gani ang Cebu Sealife Inc. mao usab ang grupo nga nagdumala sa Manila Ocean Park sa kaulohan. (/GMR)(BANAT NEWS)