Asawa ni Patiño nanawagan

CEBU, Philippines – Asawa sa abogado ug kanhi miyembro sa media ang nanawagan nga dili unta hukman sa publiko ang iyang bana tungod kay giingong biktima lang kini sa usa ka “fabricated case”.

Kagahapon ni-post diha sa social media ang asawa ni Attorney Juril Patiño nga si Lilibeth Patiño gamit ang social media account sa bana niini. “I am appealing to everybody not to judge and condemn my husband. You do not know the story behind this fabricated case against him. Attorney Juril is only a victim of injustice”, tipik sa pamahayag ni Lilibeth.

Niadtong Lunes gisikop sa mga operatiba sa National Bureau of Investigation (NBI)-7 si Juril sa kasong pagpanglugos og menor de edad.

Si Juril gipasanginlan nga nilugos sa 13-anyos nga batang babaye nga anak sa ilang labandera sulod sa iyang sakyanan niadtong Hulyo 4, 2017 diha sa Zamora St. sa Barangay Parian, Dakbayan sa Sugbo. Niadtong Hulyo 23, 2018 nigawas ang warrant of arrest batok kang Juril apan matud sa NBI-7 nga nagtago-tago kini hinungdan nga wala dayon madakpi.  Sa dihang gipangayoan sa mga tigbalita og habig si Juril nipili kini nga magpakahilom. (/BDB)(BANAT NEWS)