Gipasanginlang nanulis napatay sa mga polis
CEBU, Philippines — Usa ka gipasanginlang notadong tulisan ang napusilan patay sa mga polis nga miresponde human niini gikatahong gitulis ang usa ka delivery van diha sa may Imus Road sa Brgy. Lorega-San Miguel, Dakbayan sa Sugbo.
Sumala pa sa gihatag nga impormasyon ni Police Captain Armando Labora, nga usa ka Greggy Arnado Senining , 34, nga collector sa usa ka kompanya ang gikatahong gisuwayan pagtulis sa maong napatay nga lalaki kansang pangalan wala pa nila ibutyag.
Matud pa nga ang grupo ni Police Captain Armando Labora nag-checkpoint sa New Imus Road, Brgy. Lorega-San Miguel dili layo sa nahitaboan sa dihang matud pa nabantayan nila ang usa ka delivery van nga nagbabag sa dalan.
“Nahibulong ang mga pulis nga nagbabag ang service van sa ahente, so giduol sa atong tropa mao ‘to nibuto lag kalit, kato na diay ang tulisan nagpabuto nila,” matud pang Labora.
Matud ni Labora, ang mga polis sa checkpoint nakigginukoray nga niresulta sa sinukliay og bala sa duha ka habig hangtud nga napatay ang maong lalaki.
Dali nga gidala sa Cebu City Medical Center sakay sa usa ka ambulansya ang lalaki apan giingong patay na kini pagabot didto.
Nakuha gikan sa suspek ang usa ka kutsilyo ug usa ka wala pa matino sa kalibre sa armas. - Jenny Luz R. Tejas (BANAT NEWS)
- Latest
