Dino, Ahong nagsabot sa PUV modernization
CEBU, Philippines – Nakigkita si Presidential Assistant for the Visayas Michael Dino kang Lapu-Lapu City Mayor Junard “Ahong” Chan aron pagklaro sa isyu sa Public Utility Vehicle (PUV) Modernization Program sa gobiyerno. Si Land Transportation Franchising and Regulatory Board 7 Director Eduardo Montealto Jr. nihangyo kang Dino nga manginlabot sa maong isyu nunot sa pamahayag ni Chan.
“I know that Mayor Chan is a very reasonable man and how he has been very supportive of President Duterte’s programs,” asoy ni Dino.
Tinguha ni Chan nga susihon pagbalik ang Local Public Transport Route Plan (LPTRP) sa niaging administrasyon.
Giklaro ni Chan nga suportado niya ang PUV Modernization Program ni Presidente Rodrigo Duterte.
“Ato lang giklaro nga kita dili ta supak sa modernization sa atong transportation, sayop na ang naa sa balita karon. Kita paborable gyud ta sa modernization, ang atoa lang gusto nato ma-review ang rota nato sa e-jeep,” matud ni Chan.
Dili buot si Chan nga mawani ang mga tricycle ug multi-cab drivers subay sa plano nga 100 ka electronic jeepneys ang padaganon sa dakbayan.
Sa pagkakaron 25 pa ka e-jeep ang gipadagan sa Mactan Island nga magtuyok-tuyok sa upat ka rota.
Gihangop sa pipila ka drayber ug operator sa mga traysikol ug mga multi-cabs nga pasaheroan ang unang pamahayag ni Chan.
Si Christopher Laping, 54, operator ug drayber sa multicab nga nagbiyahe sa Mepz 1-Cordova, sa iyang reaksiyon niingon nga kun hingpit na nga managan ang dugang 75 ka e-jeep iyang napanglantawan nga daku kini og epekto sa ilang panginabuhi.
Gidayeg hinoon ni Leonisa Ceballos, 43, trabahante sa MEPZ 1 ang modernization program sa transportasyon tungod kay gitumong man kini sa ilang kasegurohan sa mga sumasakay ilabi na nga daghang multi-cabs ug PUJ nga wala na maatiman sa mga drayber ug mga operators nga sige gihapon ang biyahe.
Gilusad sa LTFRB-7 ang transportation modernization program niadtong Hulyo 11 diin gibuksan ang bag-ong mga prangkisa alang sa Dakbayan sa Lapu-Lapu, Cordova ug Dakbayan sa Danao. (Romeo T. Limpangog/GMR)(BANAT NEWS)
- Latest
