Mga sakyanan nga gidonar, gubaon?

CEBU, Philippines — Ubang mga opisyales sa barangay sa Dakbayan sa Sugbo wala mopirma sa deed of donation ug pagdawat sa mga sakyanan nga gipanag-iya sa kagamhanan sa siyudad nga gihatag kanila sa miaging administrasyon kay mga guba na kini.

Gibutyag ni Atty. Hunyo Maratas, pangulo sa Department of General Services nga karon ilang gisusi ang mga dokumento sa mga sakyanan nga idonar ngadto sa kabarangayan.

Si Maratas nagkanayon nga adunay 117 ka mga sakyanan nga gi-aprubahan sa konseho sa miaging administrasyon nga idonar ngadto sa mga barangay.

Dugang ni Maratas nga sa pagkakaron, ang pipila ka mga opisyales sa barangay mihatag og suwat hangyo alang sa mga sakyanan gikan sa iyang buhatan.

Ang presidente sa Association of Barangay Councils sa siyudad nga si Kasambagan Barangay Captain Franklyn Ong miingon nga siya naglaum nga si Labella magpadayon sa pagtabang sa kabarangayan ingon man sa pagmentinar sa mga sakyanan kay wala silay pundo alang niini karong tuiga.

Si Ong miangkon nga ang pipila ka mga kapitan nabalaka sa dili maayo nga kondisyon sa mga sakyanan nga idonar ngadto kanila.

Gisulti na niya nga iyang hisgutan si Labella niini kinsa nagplano nga tigumon ang tanang 80 ka mga kapitan.

Samtang ang 437 ka mga armas nga gidonar ngadto sa Cebu City Police Office si Maratas miingon nga ang deed of donation ug acceptance gipirmahan na. Dugang pa niya nga kinahanglan niya nga usisahon kon ang mga sakyanan nga gidonar sa CCPO, BJMP-7 ug BFP-7 napirmahan na ba sab. (/DILT)(BANATNEWS)