Mangunguot sa Colon namusil, duha angol

CEBU, Philippines — Usa ka dispatser ug usa ka babayeng pasahero ang nangaangol human kalit nga namusil ang usa ka gidudahang mangunguot human kini gibadlong diha sa dalan Colon, Barangay Kalubihan sa Dakbayan sa Sugbo niadtong Biyernes sa gabii.

Ang nalandig sa tambalanan mao si Proxil Lumapa, 36, taga Laray, Barangay Inayawan. Samtang naigo sab sa saag nga bala ang pasaherong si Pearl Dungog, 28, taga Barangay Mambaling.

Matud pa ni Police Staff Sergeant Eric Arnido, imbestigador sa Carbon Police Station way nakaila sa maong mangunguot tungod kay pulos nangambot ang mga tawo duol sa nahitaboan.

Apan base sa ilang imbestigasyon, sayo niana, adunay gibadlong si Lumapa nga notadong mangunguot sa dalan Colon. Paglabay sa pipila ka gutlo adunay lalaki nga niabot ug gipusil si Lumapa kinsa naigo ra sa bukton.

Apan ang bala nilapos kang Dungog ug naigo kini sa iyang paa. Ang duha daling gidala sa tambalanan. (/IBM)(BANATNEWS)