5-anyos natagak sa imburnal

CEBU, Philippines — Usa ka search and rescue operation ang gilusad sa mga tinugyanan sa Cebu City Disaster Risk Reduction and Management Office, kapulisan ug mga kawani sa Barangay Basak Pardo pagpangita sa usa ka bata sa culvert sa may Sitio Exoville, Basak Pardo ning Dakbayan sa Sugbo.

Ang padayon gipangita mao si John Clark Ebua, 5-anyos ug residente sa maong lugar.

Matud pa ni Harrold Alcontin, pangulo sa CCDRRMO sa dakbayan giingong nagduwa og bola ang mga bata samtang nagbunok ang uwan apan nalagpot sa layo ang bola mao nga gigukod kini ni Ebua.

Matud pa nga adunay usa sa mga kaduwa ni Ebua ang nakakita nga natagak ang naulahi sa culvert o imburnal nga way takob. Daling nangayo og tabang ang mga tawo didto ngadto sa barangay hinungdan sa pagabot-abot sa mga responders.

Gisubay nila tanang mga kanal ug imburnal ug nakahabwa pa gani sila og dili mominos 20 ka mga sakong basura gikan didto apan wala didto ang bata.

Ang amahan sa bata nga si Ryan nitug-an nga nakahuman na og ligo iyang anak ug nagduwa-duwa pa sila apan pipila ka gutlo nangayo kini og kwarta kay mopalit og biskwit hinungdan iyang gihatagan.

Apan duha palang ka minutos gikan sa pagbiya sa iyang anak gipahibalo siya sa mga silingan nga natagak iyang anak sa culvert. Ang amahan nitug-an nga wala ra siya mabalaka una kay kahibalo man siya nga mouli ra iyang anak bisan malangay usahay kay magduwa man kini.

Ang amahan malaumon nga buhi pa gihapon ang iyang anak ug makit-an kini ug unongan lang sila sa tanan sa pagpangita kaniya. (/IBM)(BANATNEWS)