Mga tanod i-deputize pag-isyu og citation ticket

CEBU, Philippines – Ang traffic czar sa Dakbayan sa Talisay Jonathan “Joy” Tumulak nagplano sa pag -deputize sa mga tanod sa 22 ka barangay sa siyudad sa pag-isyu og citation ticket.

Si Tumulak nipasabot nga karon nga seryoso sila sa pagpatuman sa lagda sa trapiko dako og matabang kanila ang opisyales sa kabarangayan.

Matud ni Tumulak nga ilang giuna ang “no helmet policy” ug uban pang mga kalapasan sa trapiko tungod kay kini maoy usa sa mga prayoridad ni Mayor Gerald Anthony “Samsam” Gullas, Jr.. Si Tumulak nakigtagbo sa mga kapitan sa tanang barangay ug nipahibawo nga iyang i-deputize sa pag-isyu og citation ticket sa malapason sa lagda sa trapiko.

Sa maong pamaagi madugangan ang ilang pwersa alang sa pagdisiplina sa mga motoristang badlongon.

Dugang ni Tumulak nga ipaubos una nila og training ang mga barangay tanod aron nga mahingpit ang ilang plano alang sa kahapsay sa kadalanan sa siyudad. (Gabriel C. Bonjoc/BDB)

Karsada dapit  sa merkado sa  Tabunok gihapsay

Mga manindahay diha sa merkado sa Barangay Tabunok, Dakbayan sa Talisay ang gipanghangyo nga mosibog aron dili makababag diha sa karsada.

Tumong niini nga mahapsay ang lugar ug dili maghuot ang dagan sa sakyanan ug usab dili maglisod sa pag-agi ang pedestrian.

Ang mga habal-habal ug ubang mga sakyanan dili na usab kini tugotan nga magpataka lang og parade diha sa lugar.

Si Mayor Gerald Anthony “Samsam” Gullas, Jr. nimando ni Jonathan “Joy” Tumulak, traffic czar sa Dakbayan sa Talisay nga pakigkitaan ang mga manindahay aron pasabton nga ang ilang gibuhat mao lang ang pagtuman sa ilang trabaho nga mahapsay ang lugar alang sa kaayohan sa tanan.

Sa nasayran, ang Tabunok nga agianan sa mga sakyanan paingon sa Siyudad sa Sugbo ug sa habagatan makita ang kahuot sa trapiko apan dihang nasugdan ang pagpahiluna sa manindahay ug ubang nakababag sa karsada nakita na ang kausaban tungod kay nihapsay kini.

Pipila ka mga nitizen nga nakabantay sa kausaban nipadayag sa ilang pasalamat kang Gullas tungod kay hamugaway na ang ilang pagbiyahe sa lugar.

Si Tumulak nagkanayon nga nagsabot na sila sa mga manindahay nga aron sila magpadayon sa ilang panginabuhian kinahanglan nga ilang imentinar ang kalimpiyo sa ilang palibot ilabi na nga uban kanila pagkaon ang ilang produkto.

Dugang ni Tumulak nga ang tabang ug pagsabot sa manindahay sa lugar maoy dakong tampo sa nakita karon nga resulta sa kahapsay. (/BDB)(BANAT NEWS)