Ex-mayor Loot subling gi-monitor sa PRO-7

CEBU, Philippines – Ang Police Regional Office-7 nag monitor na usab karun sa kanhi Daan Bantayan Mayor Vicente Loot human dunay mga taho nga mibalik kini sa illegal nga drugas base sa impormasyong nadawat ni Presidente Duterte.

Matud pa ni Police Brigadier General Debold Sinas, direktor sa PRO-7 nga may kaugalingong mga tinubdan sa impormasyon ang presidente.

Tungod niini si Sinas mimando sa mga intelligence units sa rehiyon paghimo og beripikasyon kun unsa ka tinuod ang gibuhiang pamahayag sa pangulo. 

“Usa gyud sa gisuspetsahan napud niya (Duterte) is basi’g naa napoy report nga nadawat si presidente nga active napud si ex-mayor Loot. So we will be checking our intel kay dugay-dugay siya nawala,” matud niya.

Apan giklaro ni Sinas nga ang tanan subject pa for verification ug wala na mohatag pa og dugang mga impormasyon bahin niini.

“No comment sa mi sa mga whatever operations and investigations kay Loot,” matud ni Sinas.

Gisuwayan pagkontak sa Banat News si Loot aron makuhaan og komento bahin niining bag-o na usab nga pasangil ni Duterte, apan wala kini motubag bisan sa messenger. (Mylen Manto/IBM)

Naghatud sa anak gipusil patay

Patay ang usa ka trisikad driver nga giingong suspek usab sa pagpatay onse ka tuig na ang nakalabay human kini gipusil sa riding in tandem alas-5 sa kaadlawon kagahapong adlawa diha sa Upper Highway, Barangay Pilipog, Lungsod sa Cordova.

Ang nakalas naila nga si Romeo Calunod, 57anyos, adunay kapuyo ug taga Sitio Narra, sa maong barangay.

Matud pa ni Police Staff Sergeant Renato Inot, Desk Officer sa Cordova Police Station gikan pa naghatud sa iyang anak didto sa eskuylahan  gamit iyang trisikad ang biktima sa dihang kini gitaparan og motorsiklo ug gipusil sa dayon na niyang pagpauli.

Ang biktima nakaangkon og mga samad pinusilan sa iyang ulo ug kalawasan nga maoy naingnan sa hinanali niini nga kamatayon.

Ang kapulisan nakasakmit og tulo ka basiyo sa bala sa kalibre .45 diha sa crime scene.

Padayon ang gihimo karon nga imbestigasyon sa kapulisan may kalabutan sa maong pagpatay lakip na ang pagsubay sa kaniadto kasong pagpatay nga gikalambigitan sa biktima dihang gipatay si Jerry Ligan onse ka tuig na ang nilabay. (Rowena Capistrano/IBM)(BANAT NEWS)