Ngitngit nga mga dapit pasug-an
CEBU, Philippines – Matubag na unya ang reklamo sa mga Talisaynon labot sa kangitngit sa ilang mga lugar.
Gipahibawo ni Dr. Jomar Rubio, executive assistant ni City of Talisay Mayor Gerald Anthony “Samsam” Gullas, nakigtagbo na sa mga sakop sa Aksyon Agad Mayor’s Task Force.
Si Gullas kinsa atua pa sa kaulohan alang sa seminar nga gipasiugdahan sa Department of Interior and Local Government (DILG) miangkon nga daghang Talisaynon ang nipadangat sa ilang reklamo sama sa kangitngit sa mga dapit.
Mao nga wala siya maglangay, gimanduan dayon ang iyang mga sakop aron matubag na ang mga suliran.
Sigon pa niya nga ang pagpasuga sa kadalanan daku gyud og tabang sa tanan ilabi na sa seguridad.
Usa sa iyang mando nga pasuroyon ang mga sakop sa task force sa kagabhion aron sila mismo ang mahibawo kon asa dapita ang adunay problema inay maghuwat sa reklamo sa mga tawo.
Hinuon daku sab og tabang ang katawhan aron mapadali nila ang pagtubag sa reklamo. Gani midugang ang mayor nga mahimo ra gyud nga mosumbong kaniya ang katawhan pinaagi sa iyang Facebook page o sa page sa City Public Information Office. (/DILT)(BANAT NEWS)
- Latest
