Nuisance ang usa ka Abella sa South
CEBU, Philippines — Hayan apektado ang resulta sa niaging eleksyon sa mga kandidato sa pagka-konsehal sa Cebu City South District.
Kini nunot sa pag-deklarar sa Commission on Elections First Division kang Sherwin Luie Abella isip nuisance candidate.
Si Abella gipetisyonan ni Marie Velle Abella kinsa nalandig sa ika-napulo nga pwesto sa pagka-konsehal sa South District sa Cebu City.
Matud ni Marie Velle nga si Sherwin wala’y propesyon o trabaho ug wala’y kaya sa pagpangampanya.
Nakita sa Comelec First Division nga si Sherwin naghatag lang og kalibog sa mga botante sanglit pareho sila og apelyedo ni Marie Velle.
“Taking this into consideration, the two Abellas will consequently confuse voters of the 2nd District of Cebu City in the May 2019 NLE,” matud sa desisyon nga gipirmahan ni Presiding Commissioner Al Parreño uban nilang Commissioners Ma. Rowena Amelia Guanzona ug Marlon Casquejo.
Si Comelec Cebu City North District Election Officer, Atty. Marchel Sarno, kinsa nahimo nga election officer sa South District sa niaging piniliay niingon nga ang desisyo sa Comelec First Division mahimong makaapektar sa councilorial result.
Matud ni Sarno nga maghuwat sila sa order gikan sa First Division kun ihatag ba o dili ang botos ni Sherwin ngadto kang Marie Velle.
“If single position pa lang ni siya, like for mayor. Ang boto ma-transfer dayon, kini kay multi-slots ba. There is a possibility man gud ang usa ka tawo, niboto og duha ka Abella. I-check pa na ang balota,” matud ni Sarno.
Asoy ni Sarno nga ang legal remedy ni Sherwin mao ang pag-file og motion for reconsideration sa Comelec En Banc.
Sa iyang bahin si Marie Velle mapasalamaton sa desisyon diin tinguha niya nga mosang-at og motion for execution sunod semana.
“I am happy with the decision. This only proves that what is right and just prevails. I will file for execution of the decision,” matud ni Marie Velle. (/GMR)(BANATNEWS)
- Latest
