Pagbukas sa tulo karsada tun-an

CEBU, Philippines — Gitun-an sa Department of Engineering and Public Works sa kagamhanan sa Siyudad sa Sugbo ang pagbukas sa tulo ka mga dalan sa bukirang barangay aron makuhaan ang trapiko sa urban area.

Nakigkita si Konsehal Jerry Guardo sa mga inhinyero sa dakbayan aron hisgutan ang direktiba ni Mayor Edgardo Labella nga gustong makabaton og dugang kadalanan sa kabukiran niadtong Biyernes.

Si Guardo mao gihapon ang tsirman sa komite sa City Council sa imprastraktura.

“Akong gi-relay ang direction ni Mayor Labella nga we will have more road openings sa mountain barangays kay nakita nato nga daghan areas maka-access going to transcentral highway,” sigon niya.

Ang mga dalan nga giistudyohan nga buksan mao ang gikan sa Transcentral Highway paingon sa Sirao paingon sa Budlaan ngadto sa Talamban; gikan sa Guadalupe ngadto sa Kalunasan ngadto sa Babag; ug gikan sa Babag ngadto sa Sapangdaku ngadto sa Toong paingon sa Pardo.

Si Guardo nagkanayon nga ang mga engineer miuyon sa plano ni Labella kay gawas sa pagsulbad sa trapiko, makatabang usab kini sa kaugmaran sa turismo sa mga dapit.

“We want to decongest the traffic diri sa urban. Naa namay proposal nga transcentral highway sa national government nga from Naga City to Danao City, ongoing naman. Moagi na siya sa atong mountain barangay maong atong himoan pud og road opening didto para ma-connect diri sa atoa,” sigon niya.

Matud pa niya nga ang pag-construct sa mga kadalanan, kon makita nga pwede kini human sa feasibility study, sunod tuig kinahanglan mangayo og tabang gikan sa Department of Public Works and Highways-7 alang sa pundo niini.

Dugang ni Guardo moagi usab kini sa Cebu City Development Council ngadto na sa Regional Development Council-7.

Ang konsehal mipadayag nga ang DPWH usab nagduso alang sa P40 milyones nga budget gisugyot nga pondohan ang detalyado nga disenyo sa engineering alang sa pagtukod sa Guadalupe - Lahug Bypass nga dalan nga            lain nga pagbukas sa dalan.

Kon maduso ug mahimo kini nga mga projects, si Guardo miingon nga makahapsay kini sa trapiko tungod maapod-apod ngadto sa pipila nga mga dapit tungod sa pagbukas sa dalan. (/DILT)(BANATNEWS)