Bana nga hubog gidunggab sa asawa

CEBU, Philippines – Gidunggab patay sa 27-anyos nga asawa ang iyang 34-anyos nga bana kinsa giingong nakainom nga niuli sa ila human sa ilang panaglalis.

Si Police Lieutenant Jasper Reyes sa Danao City Police Station nagkanayon nga nahitabo ang among insidente niadtong Martes sa alas 5 pasado sa hapon sulod sa balay sa magtiayon sa Sitio San Antonio, Barangay Guinsay, Dakbayan sa Danao.

Gipugngan sa Banat News ang ngan sa suspek kinsa usa ka trabahante sa kompaniya sa semento ug adunay 2-anyos nga anak babaye.

Matud pa nga nag-away ang magtiayon sa wala pa ang insidente diin ang gigamit mao ang upat ka pulgada nga kutsilyo sa pagdunggab sa tuong bahin sa dughan sa biktima.

Nakadawat og taho ang kapolisan nga magsige og lalis ang magtiayon ug giingong manapat ang biktima sa ilang anak ug gituohan nga maoy hinungdan sa away.

Giandam na ang kasong parricide nga ipasaka batok sa suspek kinsa gitanggong karon sa Danao City Police Station.

Samtang Grade 10 nga tinun-an ang gitabangan og dunggab sa lima ka lalaki sa V. Rama Avenue, Guadalupe, Dakbayan sa Sugbo niadtong Lunes sa gabii.

Giila ang biktima nga si Jeremia Baclayon, 22-anyos, taga Banawa, San Roque, Barangay Guadalupe.

Ang mga suspek mao sila si Junel Ocoy, Karl Jay Baculi, Jade Flores Nabua ug duha ka wala pa mailhi kinsa mga hingkod na ang pangedaron nga taga Barangay Calamba, Dakbayan sa Sugbo.

Base sa imbestigasyon nga gipangulohan ni Police Captain Dexter Basirgo sa Police Station 9 nasayran nga ang biktima naglakaw padulong uli gikan sa eskwelahan dihang giatangan sa grupo dayun gitabangan og dunggab sa lain-laing parte sa lawas gamit ang kutsilyo ug icepick.

Dali nga gidala ang biktima sa Cebu City Medical Center samtang ang mga suspek nakasibat.

Matud ni Basirgo na ang biktima dili ang target sa grupo kun dili ang amigo niini nga may atraso kanila nga gituohang selos sa uyab.

Ang biktima nakaangkon og lima ka dinunggaban sa lawas nga anaa sa ulo, buko-buko, tiil ug tiyan apan luwas na kini sa delikadong kahimtang. (Rose Carmel De la Cerna /GMR)(BANAT NEWS)