Sakyanan sa CPPO di ipa-recall
CEBU, Philippines – Giklaro sa bag-ong direktor sa Cebu Provincial Police Office nga si Police Colonel Roderick Mariano nga dili ipa-recall ni Cebu Governor Gwendolyn Garcia ang mga issued vehicles sa kapolisan apan ipa-inventory lang aron kon adunay wala na magamit, iuli kini ngadto sa Kapitolyo.
Matud ni Mariano nga sa inisyal nilang pagsusi, walay sobra nga sakyanan, gani kuwang pa kini.
Giingong guba ug karaan na kaayo ang ubang issued nga sakyanan sa Kapitolyo ug ang mga bag-o, gipanggamit sa mga istasyonan sa kalungsuran.
Si Mariano nagkanayon nga daku gyud og epekto sa ilang serbisyo kon bawion man gani ni Garcia ang tanang sakyanan nga ilang gigamit karon.
Nasayran nga migawas ang taho nga atol sa unang adlaw ni Garcia sa Kapitolyo, mimando kini nga ipang-recall ang tanang sakyanan nga giisyu sa miaging administrasyon, butang nga gihimakak sa gobernadora.
Gipadayag usab sa director sa CPPO nga magbutang sila og mga checkpoint sa mga dapit sa lalawigan nga adunay quarry isip suporta sa temporaryong pagpahunong ni Garcia sa tanang quarry operations.
Ang tigpamaba sa CPPO nga si Police Lieutenant Colonel Eloveo Marquez nagkanayon nga mga dakbayan sa Naga ug Toledo ingon man ang kalungsuran sa Asturias, Balamban, Tuburan, Compostela ug Consolacion ang adunay quarry operations. (/DILT)(BANAT NEWS)
- Latest
