Capitol Resource Center gipahunong
CEBU, Philippines — Gipahunong ni Gobernador Gwendolyn Garcia ang pagpatrabaho 20-storey resource center sa Kapitolyo nga gisugdan sa administrasyon ni kanhi gobernador, karon Bise Gobernador Hilario Davide III.
Kini ang labing unang executive order nga giluwatan ni Garcia sa unang adlaw niya sa pwesto ang pagdili sa kontraktor ug ni bisan kinsa sa pagpadayun sa P1.3 bilyones nga proyekto.
Gitumbok sa kamanduan ni Garcia nga kalapasan sa National Heritage Cultural Act of 2009 ang maong resource center.
Matud ni Garcia nga wala sab gihatagan og pagtugot sa hunta probinsiyal aron nga mosulod og Deed of Assignment with Hold-Out alang sa maong proyekto.
Si Garcia nisusi dayun sa construction site sa resource center sulod sa Capitol compound uban sa iyang transition team.
Gimanduan usab ni Garcia ang Provincial Legal Office nga i-review ang supplemental budget 1 diin nalakip ang P1.5 bilyones nga loan alang sa pagpondo sa maong edipisyo.
Una na nga gipadayag ni Garcia nga wala sa linya sa iyang programa ang Capitol Resource Center.
Si Davide nagkanayon nga “prerogative” ni Garcia kung iyang ipahunong ang katukuran sa maong resource center.
Subling nisaysay si Davide nga naa na sa korte ang kaso kalabot sa maong edipisyo.
“The matter is already in court. Let the court decide. But I recognize, I acknowledge nga iya na prerogative kay governor man siya,” matud ni Davide. (BANAT NEWS)
- Latest
