1,500 ka punoan sa kahoy gitanom sa mga sundawo
CEBU, Philippines — Nikabat ngadto sa 1,500 ka punoan sa kahoy ang gitanom sa mga sundalo sa 3rd Infantry Division sa Philippine Army nga gipangulohan ni Mayor General Dinoh Dolina didto sa Sitio Obog, Barangay Jaena Norte, Jamindan, Capiz niadtong Hunyo 25, 2019.
Ang maong kalihukan kalabutan kini sa Provincial Arbor Day sa Probinsiya sa Capiz diin ang kagamhanan sa probinsiya, Department of Environment and Natural Resources (DENR)-6, kasundalohan ug International Police Commission nagtambayayong.
Nikabat sa 360 ka kawani gikan sa mga ahensiya sa gobiyerno ang aktibo nga niapil sa pagtanom og mga kahoy nga gitawag og “One Million Trees in One Day: One in One Project.”
Lakip usab sa maong kalihukan si Director Francisco Milla, Jr., regional executive director sa DENR-6; Livino Duran, assistant director ug technical services sa DENR-6; Joel Navarro, officer in charge ug technical services division sa Provincial Environment and Natural Resources (PENRO) - Capiz; Armin Halili, OIC sa Capiz Environment and Natural Resources - Mambusao; Danilo Laurilla, chief conservation and development division sa DENR-6; Ruel Delos Reyes, officer sa PENRO-Capiz, Reynold Escobar sa PENRO - Capiz.
Ang pagsaulog sa Provincial Arbor Day gideklara pinaagi sa Provincial Executive Order No. 004, Series of 2018. Ang kalihukan nahasubay kini sa nasudnong selebrasyon sa Philippine Arbor Day matag Hunyo 25 nga gipatuman pinaagi sa Proclamation No. 643 nga gipirmahan niadtong tuig 2004 ni kanhi Presidente Gloria Macapagal-Arroyo diin tumong niini ang pagpalambo sa eco-system alang sa rehabilitasyon sa kalikupan. (/BDB)(BANATNEWS)
- Latest
