Wala mailhing lalaki gipusil patay
CEBU, Philippines — Patay na nga napalgan ang usa ka wala mailhing lalaki human kini giingong gipusil sa wala usab mailhing kriminal niadtong Domingo sa gabii diha sa Sitio Acro, Barangay Cantabaco, Dakbayan sa Toledo.
Base sa imbestigasyon sa kapolisan gipangulohan ni SPO3 Thule Tahadlangit nga si Nicolas Gimenez Paran, hingkod ang panuigon ug residente sa lugar giingong maoy nakadiskubre sa nahitabo.
Giingong si Paran nakadungog og duha ka buto sa armas hinungdan nga nigawas kini sa ilang balay ug nisusi.
Giingong nadiskubrehan ni Paran ang usa ka tawo nga nihagba diha sa yuta samtang usa ka lalaki nga gituohang maoy kriminal ang daling nisibat sakay sa iyang motor pahilayo sa lugar.
Ang biktima daling gidala ngadto sa Carmen Copper Corporation Hospital sakay sa ambulansiya sa Barangay DAS (Don Andres Soriano) apan nakabsan na kini sa kinabuhi pag-abot sa maong tambalanan.
Ang kapolisan sa Dakbayan sa Toledo nagpahigayon og follow-up operation sa maong hitabo pag-ila sa biktima ug kriminal. Rose Carmel De la Cerna (FREEMAN)
- Latest