1,000 ka punoan sa kahoy gitanom sa mga pari ug deboto

CEBU, Philippines — Nikabat ngadto sa 1,000 ka fruit bearing trees ang gitanom sa SEDC-St. Augustine Eco Pilgrimage Park diha sa Barangay Magsico, Lungsod sa San Fernando atol sa gipahigayon nga mass for the environment sa nilabay’ng adlaw.

Gikan sa 24 ka parokya sa district 3 sa Archdiocese of Cebu ang nagtapok uban sa mga tinugyanan sa SEDC ug nananom sa maong mga kahoy.

Nangulo sa maong kalihukan si Monsignor Camilo Alia, team moderator sa Archdiocesan Shrine of San Miguel Archangel Argao ug umaabot usab nga team moderator sa Cebu Metropolitan Cathedral.

Subay niini, si Padre Murphy Sarsonas, chairman sa Cebu Archdiocesan Commission on Environmental Concern nitug-an nga ang ilang gihimo padayon kini sa ilang activity nga tree growing lakip usab ang 2,000 Hail Mary Devotion sa kapilya sa Eco park diin dili lang taga Magsico ug San Fernando ang makahimo sa pag-apil lakip usab ang gikan sa nagkadaiyang kalungsuran.

Matud ni Sarsonas nga bisan pa og ibalhin na siya ngadto sa laing parokya magpadayon gihapon ang maong proyekto sa Eco Park tungod kay iyaha kining itugyan ngadto sa bag-ong kura ug aduna usab silay memorandum of agreement niini tali sa mga stakeholder.

Gitug-an ni Sarsonas nga 1,000 ka kahoy ang ilang tinguha nga gitanom subay sa buwan sa kalikupan nga gihimo sa wala pa ang Santos nga Misa.

Sa kinatibuk-an aduna nay dul-an sa 11 mil ka kahoy ang natanom sa maong eco-park. (/BDB)(BANATNEWS)