P1M reward sa kaso ni Silawan gihatag na

CEBU, Philippines – Gihatag na ni outgoing Lapu-Lapu City Mayor Paz Radaza kagahapon sa buntag ngadto sa kapolisan ang gisaad nga P1 milyon nga reward money sa kasong pagpatay sa kolektor sa simbahan ug tinun-an nga si Christine Lee Silawan.

Si Police Colonel Limuel Obon nga maoy direktor sa Lapu-Lapu City Police Office (LCPO) maoy nagdawat sa tseke nga gihatag ni Radaza.

Ang maong kantidad bahinon sa 23 ka tawo nga nagtumbok sa akusado nga si Renato Llenes.

Unang nakapresentar ang National Bureau of Investigation (NBI) 7 og suspek nga menor de edad nga giingong kanhi hinigugma sa biktima apan ang kapolisan nipresentar og laing suspek nga si Llenes kinsa niangkon ngadto sa kapolisan ug sa mga tigbalita sa krimen. Gumikan sa pag-angkon ni Llenes, gipabuhian sa piskalya ang menor de edad. (Romeo T. Limpangog/GMR)

‘Hot meat’ labing daghan karong tuiga

Usa ka toneladang hot meat o mishandled meat ang nasakmit sa hiniusang operasyon sa National Meat Inspection Service ug mga tinugyanan sa Department of Veterinary Medicine and Fisheries sa Carbon Public Market sa Dakbayan sa Sugbo.

Kini naglangkub sa mga imported nga karneng baboy ug mga manok gikan sa upat ka mamaligyaay sa Carbon Public Market. Ang mga tinugyanan sa DVMF taud-taud na nga nag-monitor sa mga negosyante hinungdan nga atol sa operation, upat gyud ka negosyante ang nasuta nga nakalapas sa mga lagda.

Ang mga kalapasan naglangkub sa hugaw ang palibot, walay mga dokumento, wala usab motuman sa insaktong storage temperature sa mga karne diin delikado kini sa kontaminasyon.

Ang mga karne nga nasakmit gipanglubong kini aron dili na kini mapuslan.

Si Dr. Alice Utlang, ang pangulo sa DVMF, nitug-an nga mas daghan karong tuiga ang ilang nasakmit.

Sa kinatibuk-an niabot sa sobra usa ka gatus ka libo ka pesos ang kinatibuk-ang kantidad sa mga karne nga nasakmit. (/GMR)(BANAT NEWS)