Ubang dashcams gubaon

CEBU, Philippines – Mohangyo ang Cebu City Transportation Office (CCTO) aron hulipan ang dili momenus 30 ka dashboard cameras nga ilang gipanghatag ngadto sa mga jeepney drivers.

Sigon sa operations chief sa CCTO nga si Francisco Ouano nga atol sa ilang pagpamutang sa mga units ngadto sa mga Public Utility Jeepneys (PUJs) nasuta nga adunay mga unserviceable units o dili magamit nga dashcams.

Kahinumduman nga niadtong Hunyo 29, nagsugod ang pagtaud sa mga dashboard cameras ngadto sa mga PUJs nga adunay existing travel line sa siyudad.

Ang supplier mipadala og technicians nga maoy modumala sa installation procedures uban ang mga personnel sa CCTO.

Nasayran na nipalit ang kagamhanan sa Siyudad sa Sugbo og usa ka libo ka units sa dashcams nga ipang-apud-apod sa mga qualified drivers.

Hinungdan nga ang executive department nitagana og P5 milyones alang sa procurement sa maong mga dashcams aron sa pagpugong sa kriminilidad ug pagpalambo sa peace and order situation.

Ang pangulo sa Bids and Awards Committee nga si Ronaldo Malacora miingon nga wala pa siya masayod niini apan ang supplier moilis niini subay na sa nakalatid sa terms ug conditions.

Atol sa public bidding, ang United Automart ang gideklarar nga winning bidder human mitanyag og labing ubos nga presyo ug nakatuman sa gikinahanglan nga mga dokumento.

Ang mga PUJ drivers nipirma og kasabutan tali sa siyudad sa pagkuha nila sa dashcams. Pipila sa mga importanteng features sa kasabutan mao nga ang operator maoy manubag kon ang dashcams maguba o mawagtang ug ang driver dili mahimong mobaligya niini.  Dugang ni Ouano, nahuman na sila sa pagbutang sa 900 ka units ngadto sa mga PUJs nga nakatuman sa gipangayo nilang rekisitos. (/DILT)(BANAT NEWS)