Trapik sa Mambaling luag na

CEBU, Philippines — Sa ikatulong adlaw nga pagbukas sa underpass sa Natalio Bacalso Avenue, wala’y nakitang problema ang Cebu City Transportation Office (CCTO) gawas lang niadtong mga dapit sa tunghaan nga dunay traffic gumikan sa mga maghatud sa mga estudyante ug mo-park daplin sa karsada.

Apan matud sa operations chief sa CCTO, Francisco Ouano, nga nakita gyud nila nga nigaan ang dagan sa trapiko sa maong dapit ug daku gyud og natabang ang underpass aron mabahig ang mga sakyanan ilabi na kadtong padulong sa north ug south.

Giklaro ni Ouano nga ang mga public utility jeepney (PUJs) mahimong moagi sa underpass apan dili sila pwede mag-loading ug unloading sa dapit aron malikayan ang disgrasya.

Karon nga abli na ang underpass, hapsay na ang dagan sa dapit apan awhag ni Ouano sa publiko ilabi na sa mga motorista nga kun dunay lakaw mas maayong mosayo lang gihapon og gikan aron dili matanggong sa traffic. (BANAT NEWS)