Jamora: Kaugmaran sa 20-storey building magpadayon

MANILA, Philippines — Bisan pa og wala aprobahi sa treasurer sa Probinsya sa Sugbo ang P194 milyones mga mobilization fee sa contractor sa katukoran sa 20-storey resource center magpadayon gihapon ang trabaho niini ug dili mahunong.

Matud ni Engineer Hector Jamora, hepe sa Provincial Engineering Office nga dili maapektohan ang trabaho sa maong proyekto bisan og dili makahatag ang Kapitolyo sa advance payment ngadto sa WT Construction nga maoy contractor sa maong edipisyo.

Gipasabot ni Jamora nga ang mobilization fee “prerogative” lang sa contractor nga maka-claim alang sa advance payment niini.

“But it does not mean nga if dili siya katagaan og unsa mohunong siya sa iyang project, ongoing man ang project diha”, matud ni Jamora.

Ang mobilization fee gastohan unta kini sa contractor alang sa implementasyon sa maong proyekto sama sa pagpalit og materyales ug sweldo sa mga trabahante.

Ang advance payment nga gipangayo sa contractor “deductible” kini sa “progress billing”, niini.

Nagtuo si Jamora nga makapadayon gihapon ang WT Construction sa pagtrabaho tungod kay stable ang financial capability sa maong contractor.

Sa pagkakaron anaa na sa excavation phase ang pagtrabaho sa resource center ug sheet piling sa daplin.

Si Roy Salubre, treasurer sa Kapitolyo wala mo-approve sa pagpagawas sa pundo ug wala usab kini mohatag og eksplinasyon niini. (BANAT NEWS)