Igsuon, pag-umangkon giunay og dunggab

CEBU, Philippines — Nanunggab sa iyang igsuon ug pag-umangkon ang 49-anyos nga lalaki atol sa ika-80 nga birthday celebration sa ilang amahan sa Brgy. Azucena sa Lungsod sa Barili niadtong Sabado sa hapon.

Ang mga biktima mao sila si Esilito Escarpe, 46-anyos, taga Brgy. Gibuangan, Barili ug ang 19-anyos niini nga pag-umangkon nga si Uriel Escarpe, taga Brgy. Pajo, Lapu-Lapu City.

Matud ni Police Master Sergeant Mark Anthony Fat, giselebrar sa siyam ka managsuon ug mga apo ang ika-80 nga adlawng natawhan ni Emmanuel Escarpe.

Apan taliwala sa panag-inom, ang suspek nga si Enrique Escarpe, nagkalalis sa iyang pag-umangkon nga si Ian Escarpe.

Ang duha gibadlong ni Esilito mao nasay gidumtan ni Enrique.

Giingong mipunit si Enrique og dakung bato ug gihapak ngadto sa iyang igsuon.

Gibadlong ug gipakalma kini ni Uriel apan mao na usab kini ang gikalagutan sa iyang uyoan.

Mikuha og kutsilyo si Enrique ug gidunggab ang tuong kamot ug paa ni Uriel. 

Sa pagkakita ni Esilito, miuwang kini apan mao na usab kini ang nadunggaban sa iyang walang siko.

Miresponde ang kapolisan sa Barili ug gidala ang mga samaran sa Barili District Hospital. Samtang gipriso na karon ang suspek ug mag-atubang og kasong Attempted Homicide. (/DILT)(BANATNEWS)