Mayor, Bokal Martinez gikiha

CEBU, Philippines — Gikiha sa mga volunteers ni Senator-elect Ronald “Bato” dela Rosa sila si Bogo City Mayor Carlo Martinez ug igsuon nga si ex-officio Provincial Board Member Celestino “Tining” Martinez III sa buhatan sa Ombudsman.

Kini human sa giingong pagtanggong kanila sa barangay hall sa Cayang, Dakbayan sa Bogo, gipangulata, gipangsagpa ug gipakauwawan sa daghang tawo atol sa adlaw sa eleksyon niadtong Mayo 13.

Gawas sa magsuong Martinez, apil sa gikiha sila si Bogo City Councilor Brainard “Digoy” Mayol, Barangay Cayang Councilman Alexander Estrella, usa ka Jonathan “Caloy” Casinillo ug laing wala mailhi nga kauban.

Ang mga reklamante mao sila si Radem Catapan Codera, Chan Dave Villamor Piape, Junel Fontanoza Catamco, Glien Lepasana Paberan, Reymar Rivero Velez, Ma. Beverly Delos Santos Villanueva, Anthony Rivero Velez, ug duha ka menor de edad nga lalaki, pulos taga Dakbayan sa Bogo.

Gawas nga volunteers sila ni dela Rosa, sila sab mga sinaligan sa kampo ni Congressswoman-elect Janice Salimbangon ug sa kandidato sa pagka-mayor nga si Arturo Pacifico.

Sa wala pa nakapa-blotter ang mga reklamante, giingong giunhan na sila sa pagpa-blotter sa abogado ni Mayor Martinez ug gipagawas nga sila ang mga naghimo og kasamok sa barangay.

Dihang gidala sa mga tawo ni Martinez ang mga reklamante sa barangay hall sa Cayang alas 11 sa buntag, matud pa nga giingnan sila ni Estrella nga, “unsa may gibuhat ninyo diri?” “Ngano naabot man mo diri, nagsamok samok mo sa among barangay,” ug wala na sila pagawasa.

Pipila ka minutos naabot si Mayor Martinez ug diretsong nanagpa kang Piape ug giingna nga, “maldito ka?” Kinsa may isog ninyo?”

Lakip sa giingong gisagpa ni Mayor Martinez ang 16-anyos pa nga kauban sa grupo.

Taud-taud niabot si Tining kinsa maoy barangay kapitan sa Cayang kuyog ni Mayol ug mao na sab ang giingong nanagpa sa laing mga kauban sa grupo.

Giingong gipapirma ang mga reklamante og papel sa abogado ni Martinez nga si Atty. Al Jason Minguez ug gipaangkon nga sila ang naghimo og kagubot sa barangay ug nakagawas lang dihang niabot ang abogado sa One Cebu Party nga maoy nagdala kanila sa Bogo City Police Station.

Sa buwag nga suwat, si Pacifico nipadala og kopya sa maong reklamo sa buhatan ni Presidente Rodrigo Duterte, dela Rosa, Interior and Local Government Secretary Eduardo Año, Police Director-General Oscar Albayalde, Commission on Elections ug Presidential Assistant for the Visayas Michael Dino. (BANATNEWS)